BAYARAN SPP PIKEUN SMA JEUNG SMK DI JAWA BARAT BAKAL DIHARATISKEUN

Reporter/Redaktur/Editor : ENDANG SUMARDI

Gubernur Jawa Barat, Ridwan Kamil, dibarengan ku Wakil Gubernur Jawa Barat, Uu Ruzhanul Ulum, ngébréhkeun aya 9 prioritas pangwangunan anu baris dilaksanakeun ku Pamaréntah Provinsi Jawa Barat dina taun 2020 nu bakal datang. Nya éta aksés atikan Keur Saréréa, ti mimiti taun hareup bayaran SPP pikeun SMA jeung SMK di Jawa Barat bakal diharatiskeun. Salajuna Deséntralisasi Layanan Kaséhatan, baris ngamaksimalkeun program Layad Rawat, sarta aya rancana dina bentuk Invéstasi Ngawangun Rumah Sakit Kelas C jeung Kelas B di sakuliah tatar Jawa Barat, hususna pikeun wewengkon kabupatén jeung kota anu rasio rumah sakitna masih kénéh leutik.

Ěta hal téh ditepikeun dina kagiatan Kopdar GWPP (Kordinasi Panyalagaraan Pamaréntahan Umum Dina Raraga Gubernur Sabagé Wakil Pamaréntah Puseur) Tiwulan II Taun 2019 sa Jawa Barat, anu dilaksanakeun anyar-anyar ieu, di Prima Sangkanhurip Resort Kabupatén Kuningan.

Saterusna program Panumbuhan Ěkonomi Umat, anu ngabogaan basis Inovasi ngaliwatan optimalisasi program OPOP (One Pasantrén One Product), Pangembangan Destinasi jeung Infrastruktur Pariwisata ngaliwatan tilu tipeu pangembangan, nya éta ngoméan aksés, nyampurnakeun destinasi jeung nyieun KĚK (Kawasan Ěkonomi Khuhus), di satiap Kabupatén jeung Kota di Jawa Barat. Anapon prioritas pangwangunan lianna, nya éta Atikan Agama jeung Tempat Ibadah Juara. Pikeun ngawujudkeun éta hal téh, Pamaréntah Provinsi Jawa Barat jeung DPRD Provinsi Jawa Barat, danget ieu keur ngabahas Perda (Peraturan Daérah) ngeunaan Atikan Kaagamaan, diantarana ngeunaan pasantrén. Ngaliwatan éta program téh, diharepkeun bisa ngaronjatkeun kaayaan anu mingkin réligieus, sarta bisa ngaronjatkeun program Ngaji Magrib jeung Solat Subuh Barjamaah di Jawa Barat.

Satuluyna Infrastruktur Konéktivitas Wilayah, nya éta Pamaréntah Provinsi Jawa Barat ngabogaan Kantor Banhub (Badan Panghubung) di Jakarta. Ěta Kantor téh bisa dimangpaatkeun ku Kabupatén jeung Kota di Jawa Barat, pikeun ngalaksanakeun rupa-rupa kagiatan. Sabab di éta kantor téh aya tim palobi anu baris ngabantu Pamaréntah Kabupatén jeung Kota, pikeun meunang proyék infrastruktur strategis. Sedengkeun ngeunaan program Kiridit Indah (Infrastruktur Daérah), Pamaréntah Kabupatén jeung Kota di Jawa Barat bisa ngamangpaatkeun sakaligus gawé bareng jeung Bank BJB.

Lian ti éta ogé program Gerakan Ngawangun Désa. Dina éta program téh, Pamaréntah Kabupatén jeung Kota di Jawa Barat bisa ngawangun urusan désa sacara babarengan. Salajuna dijelaskeun, dina danget ieu aya kurang leuwih 500 désa di Jawa Barat, anu tadina sabagé désa mekar jadi désa maju, sarta program Subsidi Haratis Golékmah (Golongan Ěkonomi Lemah), pikeun méré palayanan kaséhatan, sakola haratis, ngoméan Rutilahu (Rumah Tidak Layak Huni), béa siswa paguron luhur, buruh juara jeung sembako haratis pikeun masarakat kurang mampuh.

Sedengkeun prioritas pangwangunan saterusna, nya éta Inovasi Palayanan Publik jeung Panataan Daérah. Ku ngaliwatan éta program téh diharepkeun, sakumna Kabupatén jeung Kota di Jawa Barat kudu sapinuhna jeung sagemblengna ngagunakeun sistim digital dina ngalaksanakeun kagiatan pamaréntahannana, sala sahijina ku ngaliwatan jeung ngagunakeun é-Budgeting. Disagigireun ti éta, ogé ngabogaan program rémunerasi pagawé, pikeun ngaronjakeun kaadilan jeung kasajahtraan ASN (Aparatur Sipil Nagara) di Jawa Barat, hususna anu rajin digawé.

Leave a Reply