DINA DANGET IEU KEUR LUMANGSUNG TURNAMÉN FUTSAL COPA LIGA SENÉN

Reporter/Redaktur/Editor : ENDANG SUMARDI

Dina danget ieu keur lumangsung Turnamén Futsal Copa Liga Senén, di Lapangan Futsal Liverpool Kota Sukabumi. Éta turnamén téh dibuka sacara resmi ku Wali Kota Sukabumi, H. Achmad Fahmi. Hadir dina kasempetan éta, Sekertaris Daérah Kota Sukabumi, Drs. H. Dida Sembada, M.M., Kapala Disporapar (Dines Kapamudaan, Olahraga jeung Pariwisata) Kota Sukabumi, H. Adang Taufik, S.H., M.Si., Kapala Bagian Humas (Hubungan Masarakat) jeung Protokol Setda Kota Sukabumi, Punjul Saépul Hayat, S.STP., M.Si., Sekertaris Diskominfo (Dines Komunikasi jeung Informatika) Kota Sukabumi, Kurnia Rahmandani, S,IP., Ketua KONI (Komite Olahraga Nasional Indonésia) Kota Sukabumi, Haickel Réza Balfas, jeung para tamu ondangan lianna.

Wali Kota Sukabumi, H. Achmad Fahmi, dina biantarana ngajelaskeun, Pamaréntah Kota Sukabumi kacida ngabagéakeunnana ku dilaksanakeunnana ieu turnamén futsal téh// Lantaran ieu turnamén téh diiluan ku ASN (Aparatur Sipil Nagara) di lingkungan Pamaréntah Kota Sukabumi jeung media. Salian ti éta ogé dijelaskeun, Pamaréntah Kota Sukabumi ngabutuhkeun para ASN anu séhat jeung seger. Sala sahijina bisa diwujudkeun ngaliwatan olahraga. Sabab saupama para ASN séhat jeung seger, bisa ngalaksanakeun tugas sacara hadé jeung maksimal.

Salajuna Sekertaris Diskominfo Kota Sukabumi,  Kurnia Rahmandani, S,IP. salaku Ketua Panata Calagara ngajelaskeun, dilaksanakeunnana Turnamén Futsal Copa Liga Senén téh, kailhaman ku kagiatan latihan maén futsal dina saban poé Senén soré, sarta aya 56 urang ASN di lingkungan Pamaréntah Kota Sukabumi anu mindeng latihan maén futsal.

Anapon maksud jeung tujuan dilaksanakeunnana ieu turnamén téh, dina raraga usaha ngaronjatkeun kakulawargaan jeung sabilulungan, katut pasatuan jeung kasatuan, hususna di kalangan ASN di lingkungan Pamaréntah Kota Sukabumi jeung média, sarta teu ngenal pabédaan di lapangan.

Saterusna dijelaskeun, ieu turnamén téh diiluan ku 7 tim gabungan ASN di lingkungan Pamaréntah Kota Sukabumi, anu ngawengku ti Pahala FC, Métro FC, Daméy FC, Abo FC, Cai FC, Jebréd FC jeung King FC, sarta 1 tim media, nya éta Jurnalis Soccer Sukabumi. Leuwih jauh dijelaskeun, ieu turnamén téh dijadwalkeun lumangsung ti tanggal 15 Juli 2019 nepi ka tanggal 2 Séptémber 2019, marebutkeun Piala Bagilir Wali Kota Sukabumi jeung uang pangbinaan.

Sedengkeun Ketua KONI Kota Sukabumi, Haickel Réza Balfas nyaritakeun, pihakna ngarasa reueus jeung ngabagéakeun sacara daria ku dilaksanakeunnana ieu turnamén futsal téh. Lian ti éta ogé nyaritakeun, pihakna ka hareup arék ngagiatkeun jeung ngaronjatkeun kagiatan sarupa dina rupa-rupa cabang olahraga, pikeun ngagairahkeun olahraga di Kota Sukabumi.

Leave a Reply